ANG PROBINSYANONG BAYANI | ANG PISO NI PEPE

ANG PISO NI PEPE

Bilang pag-gunita sa 121st na anibersayo ng pagkamatay ni  Dr. Jose Rizal (December 30, 1896), naglaro sa aking isipan kung bakit nasa PISO si Pepe. Marami ang nagsasabing ito raw ay upang magunita ng ating mga kababayan ang pambansang bayani sapagkat ang piso ay taglay ng lahat lalo na ng mga ordinaryong Pilipino.

Sa paglipas ng panahon, ito ba ay nananatili pang may halaga? Ano pa ba ang mabibili mo sa halagang piso? Hindi katulad nuong panahon ng ating mga lolo't lola, ang piso ay napakalaking bagay at pinakaiingatan. Subalit, ngayon marami ka ng makikitang nakakalat na piso sa kalsada ni halos di na pulutin ng ating mga kababayan o kadalasan hinahayaan na lamang kung ito ay mahulog sa daan. PISO LANG NAMAN YAN!!!


IBA'T IBANG MUKHA NG PISO NI RIZAL?

Sa puntong ito, nananatili pa rin ba kaya sa alaala ng mga Pilipino ang ating pambansang bayani sa kabila ng iba't ibang rebisyon ng piso sa paglipas ng panahon. Nito lamang ay mapapansin na may mga bersyon na ng piso ngunit wala na ang mukha ng "Dakilang Manunulat" at napalitan ito ng mga heneral, personalidad at imahe. Senyales ba ito na unti-unti na ring binubura at pinapatay sa alaala ng mga Pilipino ang naiambag ni Pepe para sa kasarinlan ng Pilipinas?

Naisip ko lang naman. Kung hindi man gayon ay mabuti ngunit mas mainam ng mapansin ng maaga bago pa tuluyang maglaho at di na makagisnan ng mga susunod na bata. Sa anibersaryo ng kanyang pagkamatay, manatili pa rin sanang buhay ang diwa ng ating Pambansang Bayani.